Deall cyfraddau llog: Canllaw syml iawn

Mae cyfradd llog yn dweud wrthych naill ai: pa mor uchel yw cost benthyca, neu pa mor uchel yw'r wobr am gynilo.

Os byddwch chi’n benthyg arian - i gael morgais, prynu car newydd, neu i adnewyddu eich cartref - y gyfradd llog yw'r swm o arian sy'n cael ei godi arnoch chi er mwyn cael benthyciad gan y banc neu'r gymdeithas adeiladu. Dangosir hyn fel canran o gyfanswm y benthyciad. Po uchaf y canran, po fwyaf y bydd yn rhaid i chi dalu'n ôl.

Dyma rai enghreifftiau o'r cyfraddau llog ar forgais:

Fel y gwelwch chi yn y tabl uchod , gall fod gwahaniaeth mawr rhwng talu eich benthyciadau yn ôl gyda llog o 1.5% a'i dalu yn ôl gyda llog o 3.5%. 

Gallwch ddefnyddio ein Cyfrifwr Morgais i fewnbynnu eich manylion, a chael amcangyfrif o ba gyfradd llog y byddech yn ei thalu ar forgais.

Hefyd, darllenwch ein canllaw i ddechreuwr ar gyfraddau morgeisi i wybod mwy am y gwahanol fathau o gyfraddau morgeisi sydd ar gael.

Os ydych chi'n ceisio cynilo arian, efallai ar gyfer blaendal ar eich cartref cyntaf, mae'r gyfradd gynilo yn dweud wrthych faint o arian fydd yn cael ei dalu i'ch cyfrif. 

Rhoddir y gyfradd gynilo fel canran o'ch cynilion. Po uchaf yw'r gyfradd gynilo, po fwyaf fydd yn cael ei dalu i'ch cyfrif. Gellir galw hyn yn elw ar fuddsoddiad.

Enghraifft arall: rydych chi'n rhoi £1,000 mewn cyfrif cynilo sy'n ennill llog o 2% bob blwyddyn. Mae hyn yn golygu y byddwch chi'n ennill £20 mewn llog, gan roi £1,020 i chi ar ôl blwyddyn.

Yr hafaliad a ddefnyddir i gyfrifo’r llog uchod yw:
£1,000 (eich cynilion) x 2% (cyfradd llog) = £20 (llog a enillwyd)
£1,000 (eich cynilion) + £20 (llog a enillwyd) = £1,020 yn eich cyfrif cynilo ar ôl blwyddyn 

Gallwch chi gyfrifo faint y byddech yn ei gynilo yn un o'n cyfrifon cynilo drwy ddefnyddio ein cyfrifwr cynilo.

Y 'Gyfradd Banc' yw'r gyfradd llog allweddol yn y DU. Mae'n cael ei osod gan Fanc Lloegr ac mae'n dylanwadu ar lawer o gyfraddau llog eraill yn yr economi. Yn gyffredinol pan welwch chi erthyglau newyddion am gyfraddau llog, maen nhw'n cyfeirio at newidiadau yn y Gyfradd Banc – a elwir yn aml yn gyfradd sylfaenol Banc Lloegr.

Fel yr ydym wedi dweud, mae’r Gyfradd Banc yn dylanwadu ar gyfraddau llog eraill, gan gynnwys cyfraddau cynilion a morgeisi.

Ond mae ffactorau eraill y mae benthycwyr yn eu hystyried wrth osod eu cyfraddau llog.

Mae banciau a chymdeithasau adeiladu yn ceisio cydbwyso'r cyfraddau maen nhw'n eu darparu i gynilwyr â’r cyfraddau y maent yn eu codi ar fenthycwyr.

Mae cystadleuaeth hefyd yn chwarae rôl, ac mae'n rhaid iddynt dalu eu costau hefyd. 

Na, dim o reidrwydd! Er enghraifft, pe baech chi’n cymryd morgais cyfradd sefydlog, bydd eich cyfradd llog yn aros ar yr un swm am y cyfnod o amser rydych chi'n ei osod gyda'ch benthycwr, fel arfer rhwng dwy a phum mlynedd. Yn yr un modd, mae cyfrifon cynilo cyfradd sefydlog yn gwarantu y bydd y llog a gewch ar eich cynilion yn aros yr un fath am gyfnod penodol o amser.

Ond pa bynnag gyfrif cynilo neu fenthyciad sydd gennych, mae'n bwysig eich bod yn gwybod y diweddaraf am yr hyn y mae’r newidiadau mewn cyfraddau llog yn ei olygu i chi'n bersonol.