Sut i oroesi brwydr gynigion

O’r eiliad rydych yn dechrau gwneud cynnig, ceisiwch gyflwyno’ch hun fel prynwr o ddifrif. Bydd hyn yn dangos i’r gwerthwr na fyddwch yn tynnu allan o’r cytundeb. Ystyriwch gael morgais mewn egwyddor cyn gwneud cynnig ar dŷ. Mae morgais mewn egwyddor yn dangos faint o arian y mae benthyciwr yn fodlon rhoi benthyg i chi i brynu tŷ, ar yr amod y gallwch fforddio ei brynu. Os ydych mewn brwydr gynigion, mae’n bosibl y bydd y gallu i ddarbwyllo’r gwerthwr a’r asiant y gallwch gael benthyg digon i brynu’r eiddo arwain at benderfyniad o’ch plaid. 

P’un ai chi yw’r unig un sy’n cynnig ar yr eiddo rydych ei eisiau neu mae sawl un ohonoch, peidiwch byth â datgelu eich cyllideb i’r gwerthwyr na’u hasiantau. Os bydd asiantau yn gwybod y swm uchaf rydych yn fodlon ei dalu, byddan nhw’n annog y gwerthwr i aros cyn gwerthu’r eiddo.

Os oes mwy nag un darpar brynwr yn gwneud cynnig ar eiddo, bydd asiant weithiau yn gofyn am gynnig wedi’i selio. Mae hyn yn galw ar bob darpar brynwr i gyflwyno cynnig mewn amlen wedi’i selio erbyn dyddiad penodol. Gall deimlo’n swyddogol iawn ond nid yw’n rhwymo mewn cyfraith a gallai unrhyw barti dynnu’n ôl o hyd.

Gall fod yn anodd gwybod faint i’w gynnig yn eich cynnig wedi’i selio. Nid ydych eisiau talu mwy na’r angen ond nid ydych eisiau colli allan i gynigion uwch.

Y peth olaf rydych chi eisiau ei wneud yw cynnig mwy na gwerth yr eiddo oherwydd gallai hyn arwain at fethu â chael eich arian yn ôl os byddwch yn penderfynu gwerthu. Mae hefyd yn bosibl y bydd eich benthyciwr yn gwrthod rhoi benthyg os nad yw o’r farn bod yr eiddo yn werth y pris rydych yn gofyn amdano.

Wrth gyflwyno eich cynnig, mae’n syniad da osgoi talgrynnu eich ffigurau fel bod eich cynnig yn llai tebygol o fod yr un peth ag un arall.

Ynghyd â’ch cynnig wedi’i selio, soniwch am unrhyw beth a allai eich neilltuo oddi wrth y cynigwyr eraill, ac awgrymwch eich bod o ddifrif er mwyn rhoi sicrwydd i’r gwerthwyr na fydd y cytundeb yn methu. Dylid cynnwys copi o’ch morgais mewn egwyddor a rhoi gwybod eich bod yn dymuno i bethau symud mor gyflym â phosibl.

Nid yw unrhyw gynnig gennych yn rhwymo mewn cyfraith. Os ydych yn rhan o frwydr gynigion, ac yn poeni eich bod wedi cynnig yn fwy na’r angen, gallwch dynnu eich cynnig yn ôl. Nid yw gwerthiant tŷ yn rhwymo mewn cyfraith nes bod y cytundebau wedi’u llofnodi.

Mae hefyd yn bwysig cydnabod pryd y mae’n amser i dynnu eich cynnig yn ôl. Os ydych o’r farn bod y frwydr gynigion wedi cynyddu pris yr eiddo i fwy nag ydych chi’n fodlon ei dalu, camwch yn ôl o’r frwydr a chwiliwch am eiddo arall.