Pam ddylwn i ddeall fy sgôr credyd?

Pam mae hyn yn bwysig:  

Mae benthycwyr yn defnyddio eich sgôr credyd i benderfynu pa mor ddibynadwy ydych chi wrth fenthyca ac ad-dalu arian. 

Beth yw sgôr credyd?  

Sgôr credyd yw rhif 3 digid y mae benthycwyr yn ei ddefnyddio i ganfod pa mor ddibynadwy ydych chi wrth ad-dalu unrhyw arian rydych yn ei fenthyca. Mae'n berthnasol i forgeisi, cardiau credyd, a benthyciadau, ac yn helpu benthycwyr i benderfynu: 

• a ddylid cynnig credyd i chi
• faint o gredyd y dylent ei gynnig 
• y gyfradd llog y dylid ei gweithredu

Sut ydw i'n cael gwybod beth yw fy sgôr credyd?  

Gallwch ddod o hyd i'ch sgôr credyd o Asiantaethau Gwirio Credyd (CRA) a benthycwyr. Mae'r tair asiantaeth isod yn cynnig adroddiad credyd am ddim: 

• Experian, Money Saving Expert Credit Club  
• Equifax, ClearScore  
• TransUnion, Karma 

Beth mae fy sgôr credyd yn ei olygu?  

Mae'r system sgorio yn amrywio o wael i ardderchog. Gall sgôr credyd 'gwael' olygu bod benthycwyr o'r farn y gallech fod yn annibynadwy wrth ad-dalu'r credyd a gallent wrthod benthyca i chi. Neu efallai y byddwch ond yn gymwys am gynigion gyda chyfradd llog uwch, a fydd yn golygu bod benthyca yn costio mwy i chi.

Mae sgôr ‘ardderchog’ yn golygu eich bod yn fwy tebygol o gael eich cais wedi'i dderbyn a gallech gael cynnig cyfraddau llog gwell neu swm credyd uwch.

Sut ydw i'n gwella fy sgôr credyd? 

Pam mae hyn yn bwysig:

Gallai gwella eich sgôr credyd olygu bod benthycwyr yn fwy bodlon cynnig credyd i chi. Gallai hefyd eich helpu chi i fod yn gymwys am gytundebau gyda chyfradd llog is.

Beth sydd angen i mi ei wneud? 

Ar ôl canfod eich sgôr credyd, efallai y byddwch am ystyried ffyrdd y gallwch ei wella, cyn gwneud ceisiadau i fenthycwyr. Mae rhai pethau y gallwch eu gwneud a fydd yn helpu i wella eich sgôr, gan gynnwys:

• talu eich biliau ar amser 
• gwirio eich adroddiad credyd am wallau a chamgymeriadau teipio cyn cyflwyno
• cofrestru i bleidleisio pan fyddwch yn newid eich cyfeiriad 
• peidio â gwneud cais am lawer o fenthyciadau mewn cyfnod byr

Beth sy'n effeithio ar eich sgôr credyd? 

Mae'n bwysig hefyd deall pa ffactorau a allai effeithio ar eich sgôr credyd. Dyma rai ystyriaethau:

• dim neu fawr ddim profiad gyda chredyd
• methu â thalu taliadau wrth fenthyca, gan gynnwys ‘prynu nawr a thalu'n nes ymlaen’ 
• gormod o geisiadau mewn cyfnod byr
• eisoes mewn llawer o ddyled
• symud cartref heb ddiweddaru'r gofrestr etholiadol
• defnyddio'ch credyd i gyd bob mis
• peidio â chau hen gyfrifon credyd