Beth mae trawsgludwr yn ei wneud?

Beth yw trawsgludwr?

Gweithiwr proffesiynol yw trawsgludwr sy'n gofalu am yr holl waith papur cyfreithiol sy'n ymwneud â throsglwyddo eiddo o un person i berson arall. Efallai y cyfeirir ato hefyd fel eich cyfreithiwr.

Mae gan fenthycwyr restrau o drawsgludwyr y maent yn hapus gweithio gyda nhw; bydd eich brocer neu fenthyciwr yn dweud wrthoch a yw eich trawsgludwr ar y rhestr neu beidio. Mae'r rhan fwyaf ohonynt ar y rhestr.

Beth mae trawsgludwyr yn ei wneud?

Bydd eich trawsgludwr yn archwilio'r holl agweddau ar eich eiddo cyn i chi ymrwymo i'w brynu. Bydd hefyd yn helpu i ddatrys unrhyw broblemau sy'n codi yn ystod y broses.. 

Dylech gadw mewn cysylltiad â'ch trawsgludwr i sicrhau bod y gwaith hwn yn symud yn ei flaen cyn gynted â phosibl. 

Bydd eich trawsgludwr yn cyflawni'r chwiliadau a'r gwiriadau cyfreithiol sy'n digwydd wrth werthu eiddo.  Mae'r chwiliadau a'r gwiriadau hyn yn bwysig. Maent yn eich helpu i ddeall yr holl wybodaeth y mae angen i chi wybod am eiddo cyn i chi ymrwymo i'w brynu.

Beth yw'r chwiliadau? 

Bydd eich cyfreithiwr neu drawsgludwr yn cyflawni amryw chwiliadau i wirio pethau fel: 

• a yw'r eiddo wedi'i gysylltu â charthffosydd
• pwy sy'n berchen ar unrhyw ffyrdd mynediad
• a yw'r tir y mae wedi'i adeiladu arno yn halogedig
• unrhyw beth y mae angen i chi ei wybod am yr ardal leol, fel cynlluniau ffyrdd newydd neu gamau gorfodi y mae'r cyngor lleol yn eu cymryd

Beth yw cofrestru tir ac eiddo? 

Pan ddaw'r gwerthiant i ben, bydd eich cyfreithiwr neu drawsgludwr yn cofrestru eich manylion â'r Gofrestrfa Tir. Mae hyn yn cofrestru eich perchenogaeth o'r tŷ.

Mae Cofrestrfa Tir EF yng Nghymru a Lloegr,  Cofrestrau'r Alban yn yr Alban, a Gwasanaethau Tir ac Eiddo yng Ngogledd Iwerddon sy'n delio â thir ac eiddo.

Faint mae trawsgludwyr yn ei gostio? 

Mae costau'r chwiliadau a'r cofrestru yn sefydlog. Bydd ffioedd cyfreithiol am amser ac ymdrech eich trawsgludwr yn amrywio. Bydd gan y rhan fwyaf o drawsgludwyr bris sefydlog sy'n dibynnu ar werth yr eiddo.