Rhyddhau ecwiti o'ch cartref

Beth yw ecwiti cartref? 

Ecwiti cartref yw'r gwahaniaeth rhwng gwerth eich cartref yn y farchnad ar hyn o bryd a faint sy'n ddyledus gennych o hyd ar y morgais.

Er enghraifft, os yw gwerth eich cartref yn £200,000 ac mae arnoch £120,000, eich ecwiti fyddai £80,000.

Gall ecwiti gynyddu dros amser:

• Wrth i chi dalu mwy o'ch morgais.
• Wrth i werth eich cartref dyfu.   

Beth yw rhyddhau ecwiti? 

Mae rhyddhau ecwiti yn ffordd o ddatgloi arian o'ch cartref heb orfod ei werthu. Fel arfer mae ar gael i berchnogion tai 55 oed a hŷn.

Gellir cymryd yr arian fel:

• Cyfandaliad
• Cyfres o daliadau llai
• Cyfuniad o'r ddau

Fel arfer, caiff y benthyciad ei ad-dalu pan fyddwch yn marw neu'n symud i ofal hirdymor.

Beth yw'r prif opsiynau ar gyfer rhyddhau ecwiti? 

Ceir 2 math o gynhyrchion rhyddhau ecwiti:

1. Morgais gydol oes

Morgais gydol oes yw benthyciad wedi'i ddiogelu yn erbyn eich cartref - byddwch yn parhau i fod yn berchen arno. Gallwch ddewis:

• Gwneud ad-daliadau misol.
• Gadael i'r llog gronni (a chael ei ychwanegu at eich benthyciad).

Mae'r benthyciad a'r llog yn cael eu had-dalu pan fydd eich cartref yn cael ei werthu ar ôl i chi farw neu symud i ofal hirdymor. Fel arfer, gallwch glustnodi rhywfaint o werth eich eiddo i'w adael fel etifeddiant.

2. Dychweliad cartref

Dychweliad cartref yw pan fyddwch yn gwerthu'ch holl gartref neu ran ohono i ddarparwr yn gyfnewid am gyfandaliad neu daliadau rheolaidd. Gallwch wneud y canlynol:

• Parhau i fyw yn eich cartref, heb rent, am weddill eich oes - ond rhaid i chi gynnal a chadw ac yswirio'r eiddo.
• Cadw cyfran o'r eiddo i'ch anwyliaid.

Pan fyddwch yn marw neu'n symud i ofal hirdymor, caiff y cartref ei werthu a chaiff yr arian ei rhannu'n seiliedig ar gyfrannau perchenogaeth. 

Rhesymau mae pobl yn dewis rhyddhau ecwiti

Mae rhyddhau ecwiti yn benderfyniad personol. Dyma resymau cyffredin dros wneud hynny:

• Talu am welliannau neu atgyweiriadau i'r cartref. 
• Clirio dyledion fel benthyciadau neu gardiau credyd.
• Rhoi arian i blant neu wyrion/wyresau (e.e. helpu gyda blaendal ar gyfer tŷ neu gostau prifysgol).

Pethau i'w hystyried cyn penderfynu rhyddhau ecwiti

Y costau uniongyrchol

Gall fod ffioedd a chostau gan gynnwys:

• Ffioedd cyfreithiol neu ffioedd trefnu
• Cyfraddau llog uwch o'i gymharu â morgeisi eraill ar y farchnad

Gallai rhyddhau ecwiti hefyd effeithio ar unrhyw fudd-daliadau sy'n seiliedig ar brawf modd a gewch.

Opsiynau amgen 

Cyn ymrwymo, meddyliwch am ffyrdd eraill o godi arian. Gallai hyn fod yn bethau fel lleihau maint eich tŷ, defnyddio cynilion, neu archwilio benthyciadau personol. Ewch ati i bwyso a mesur manteision ac anfanteision pob un cyn i chi benderfynu.

Yr effaith hirdymor

Gallai rhyddhau ecwiti effeithio ar eich sefyllfa ariannol yn y dyfodol. Gall leihau gwerth eich ystad ac effeithio ar yr hyn y gallwch ei adael ar ôl fel etifeddiant. Gallai hefyd effeithio ar eich incwm ymddeol neu opsiynau gofal yn y dyfodol.

Sut i ryddhau ecwiti o'ch cartref

Os ydych yn ystyried rhyddhau ecwiti, siaradwch â'ch benthyciwr neu gynghorydd cymwysedig. I siarad â'n tîm morgeisi am eich morgais Principality, cysylltwch â ni i archwilio'ch opsiynau.