Enwi tŷ newyddenedigol yn 'Tŷ Dylan'

Cyfleuster hanfodol

Mae prosiect newyddenedigol Bwrdd Iechyd Bae Abertawe, sef pum tŷ Cwtsh Clos, wedi agor yn swyddogol ac mae un o'r cartrefi'n rhannu enw masgot Cymdeithas Adeiladu Principality, sef Dylan.

Wedi'i leoli ger yr Uned Gofal Dwys Newyddenedigol (NICU) yn Ysbyty Singleton, mae Cwtsh Clos yn darparu 'cartref oddi cartref' i deuluoedd babanod newydd-anedig sy'n derbyn gofal newyddenedigol. Mae'r pum cartref dwy ystafell wely yn cynnig cyfleusterau hanfodol i leddfu'r pwysau ar deuluoedd sy'n byw'n rhy bell i ffwrdd i deithio i'r ysbyty bob dydd.

Effaith Principality

Mae cydweithwyr Principality wedi codi arian ar y cyd ar gyfer prosiect Cwtch Clos trwy ddigwyddiadau a rhoddion, gan gynnwys noddi 25 o leoedd codi arian yn Hanner Marathon Caerdydd, taith gerdded elusennol ‘Cwtsh i’r Arfordir’, a chodi arian gan gangen leol drwy gyfraniadau Aelodau.
I gydnabod cefnogaeth Principality i'r prosiect, enwyd un o dai Cwtsh Clos yn Tŷ Dylan ar ôl masgot plant y gymdeithas, Dylan y ddraig. Wrth i Principality ddathlu ei phen-blwydd yn 165 oed, mae wedi cadarnhau ei hymrwymiad i gefnogi teuluoedd a chymunedau ledled Cymru gyda'r nod o greu cymdeithas well a mwy cynhwysol.

Gair gan ein Pennaeth Gwasanaethau Cwsmeriaid Cynilo

Wrth wneud sylwadau ar Cwtsh Clos, dywedodd Kelly Young, Pennaeth Gwasanaethau Cwsmeriaid Cynilo yng Nghymdeithas Adeiladu Principality: “Am lawer o’i hanes, mae ein cangen yn Abertawe wedi chwarae rhan allweddol wrth gefnogi elusennau lleol a mentrau cymunedol. Rydym yn falch iawn o’n cydweithwyr sydd wedi cael effaith mor gadarnhaol yn ystod cyfnod a all fod yn anodd iawn i deuluoedd sy’n derbyn gofal newyddenedigol. Mae’n anrhydedd wirioneddol enwi un o gartrefi Cwtsh Clos yn Tŷ Dylan, gan adlewyrchu ein gwerthoedd wrth greu cymdeithasau tecach i gymunedau ledled Cymru.”

Gair gan Elusen Iechyd Bae Abertawe

Dywedodd Lewis Bradley, Rheolwr Cymorth Elusennau yn Elusen Iechyd Bae Abertawe: “Mae ein partneriaeth â Chymdeithas Adeiladu Principality wedi mynd o nerth i nerth dros y ddwy flynedd ddiwethaf. Gyda’n gilydd, mae dros 2,500 o staff wedi elwa o wiriadau iechyd ariannol am ddim ac mae dros £16,500 wedi'i godi i helpu i adnewyddu’r tai yn Cwtsh Clos, Singleton. Mae gennym fwy o gyfleoedd anhygoel ar y gweill eleni a’r flwyddyn nesaf, gan gynnwys ail daith gerdded ‘Cwtsh Wrth yr Arfordir’.

Mae cydweithwyr cangen Principality wedi croesawu ein hapêl Cwtsh Clos yn fawr, felly roedd yn teimlo'n iawn rhoi rhywbeth yn ôl drwy enwi tŷ rhif 2 yn 'Tŷ Dylan'. Mae'r bartneriaeth hon yn dangos yn wirioneddol sut y gall elusennau a phartneriaid corfforaethol ddod at ei gilydd nid yn unig i fod o fudd i bobl heddiw, ond hefyd i bobl yn y dyfodol.”

Abertawe yn rhan bwysig o'n hanes a'n dyfodol

Wedi'i sefydlu gyntaf ym 1860, mae Cymdeithas Adeiladu Principality wedi bod yn gonglfaen cymunedol gyda 53 o ganghennau a 14 o asiantaethau ledled Cymru a'i ffiniau, gan bartneru ag elusennau a sefydliadau lleol yn ogystal â'i chynigion gwasanaethau ariannol. Symudodd cangen canol dinas Abertawe yn ddiweddar i safle newydd ar Stryd Rhydychen gyda lleoliadau eraill yng Ngorseinon, Treforys a'r Mwmbwls.

Ers agor ei gangen gyntaf yn Abertawe ym 1934, mae Principality wedi cefnogi amrywiol elusennau a sefydliadau lleol gan gynnwys Barnardo’s Cymru, Cronfa Cenedlaethau’r Dyfodol, a Bwrdd Iechyd Bae Abertawe.
Fel rhan o’i phartneriaeth barhaus â’r bwrdd iechyd, bydd cydweithwyr Principality yn ymuno ag eiriolwyr eraill ar daith gerdded elusennol ym Mae Abertawe ym mis Medi i helpu i godi rhagor o arian ar gyfer apêl Cwtsh Clos.