Datblygiad tai nodedig yng Nghaerdydd wedi’i gwblhau ar ôl 10 mlynedd

Ynglŷn â The Mill

Mae gwaith wedi'i gwblhau ar gam olaf datblygiad The Mill, gyda'r 157 o gartrefi olaf y fenter 800 o gartrefi bellach wedi'u cwblhau.
 

Mae’r datblygiad gwerth £150m, sydd wedi ymestyn dros 10 mlynedd ers i’r cam cyntaf ddechrau yn 2014, wedi’i ariannu gan Principality Masnachol, cangen benthyca masnachol cymdeithas adeiladu fwyaf Cymru, a’i gyflawni mewn partneriaeth â Llywodraeth Cymru, Tirion Homes, Lovell a Chymdeithas Tai Cadwyn.

Ar safle melin bapur Arjo Wiggins gynt, adeiladwyd hanner yr 800 o gartrefi yn benodol ar gyfer rhent fforddiadwy drwy Tirion Homes, gan gynnwys 75 a oedd ar gael fel tai cymdeithasol. Gwerthwyd cyfanswm o 358 eiddo ar y farchnad agored gan Lovell.


Wedi'i gwblhau yn ystod y mis diwethaf, mae'r portffolio terfynol o 157 o gartrefi fforddiadwy yn cynnwys cymysgedd o fflatiau a thai, a reolir gan Gymdeithas Tai Cadwyn, ac mae pob un ohonynt eisoes wedi'u rhentu i denantiaid newydd.


Mae’r prosiect nodedig wedi trawsnewid yr hyn a oedd yn safle diffaith yn gymuned newydd gynaliadwy i Gaerdydd.

Dywedodd Richard Wales, Cyfarwyddwr Benthyca Masnachol Cymdeithas Adeiladu Principality: “Ar ôl cwblhau cam olaf datblygiad The Mill yn llwyddiannus, rydym yn gyffrous iawn i weld trawsnewid safle’r hen felin bapur segur yn gymuned fywiog a chynaliadwy i Gaerdydd.


“Mae’r garreg filltir hon yn cynrychioli ein hymrwymiad i wireddu gobeithion a dyheadau bywyd mewn ffordd sy’n gweithio i bawb. Drwy helpu pobl i mewn i’w heiddo eu hunain, ariannu tai cynaliadwy a fforddiadwy, a chefnogi creu cartrefi sy’n diwallu anghenion cenedlaethau’r dyfodol, rydym yn cyfrannu at ddyfodol mwy disglair i gymunedau lleol.” 

Yn ogystal â’r cartrefi newydd a grëwyd, mae gwaith seilwaith a wnaed yn cynnwys ffyrdd newydd, traphont a gwelliannau i amddiffynfeydd llifogydd yn yr ardal.  Mae cyfanswm o bum uned fasnachol hefyd ar gael i’w rhentu, a fydd yn cael eu rheoli gan Tirion Homes, sydd mewn trafodaethau gyda phawb sydd â diddordeb.

Mae’r safle hefyd wedi datblygu parc glan yr afon sy’n cynnwys mannau gwyrdd, ardal chwarae i blant a llwybrau beicio. Mae cynlluniau pellach ar y gweill hefyd i adeiladu ar hyn a darparu cyfleusterau ychwanegol fel rhan o'r canolbwynt sy'n cynnwys canolfan gymdogaeth, a llwybrau bysiau gyda chysylltiadau â chanol y ddinas.
 

Yr hyn y mae eraill yn ei ddweud

Dywedodd Ysgrifennydd y Cabinet dros Lywodraeth Leol, Tai a Chynllunio, Jayne Bryant: “Drwy ein buddsoddiad benthyciad, rwy'n falch ein bod wedi gallu darparu gwerth £8m o gymorth ariannol tuag at ddatblygiad The Mill.

“Gwyddom fod galw mawr am dai o ansawdd da yn yr ardal ac mae’n wych ein bod wedi gallu rhoi bywyd newydd i’r safle a darparu ar gyfer y gymuned drwy ein partneriaethau.”


Dywedodd David Ward, Prif Swyddog Gweithredol Tirion Homes: “Rydym wrth ein bodd yn dathlu cwblhau cam olaf datblygiad The Mill. Mae’r prosiect hwn yn dyst i waith caled ac ymroddiad ein tîm a’n partneriaid dros y 12 mlynedd diwethaf sydd wedi llywio sawl her yn llwyddiannus ar hyd y ffordd, yn fwyaf nodedig drwy bandemig Covid-19. Mae The Mill bellach yn ofod bywiog, cynaliadwy sy’n caniatáu i gartrefi ffynnu ar draws Caerdydd yn ogystal â bod yn rhan barhaus o’r adfywio.

“Mae'r galw mawr am y cartrefi hyn o safon yn tanlinellu pwysigrwydd ein cenhadaeth i ddarparu tai fforddiadwy. Fel sefydliad, mae pob un ohonom yn ymwneud â darparu mwy o ddewis i'r rhai na allant, neu'r rhai nad ydynt yn ceisio, prynu eu cartref eu hunain. Ni fyddai hyn yn bosibl heb gefnogaeth ddiwyro Cymdeithas Adeiladu Principality, Llywodraeth Cymru, Cadwyn, a Lovell. Rydym yn falch o fod wedi cyflawni’r cyflawniad sylweddol hwn ac edrychwn ymlaen at barhau â’n hymdrechion i adeiladu cymunedau mwy cynaliadwy yng Nghymru.”

Dywedodd James Duffett, Rheolwr Gyfarwyddwr Rhanbarthol Lovell: “The Mill yw ein datblygiad blaenllaw yng Nghaerdydd, sy’n cyfuno’r gorau oll o’n partneriaethau a’n harbenigedd gwerthu. Rydym wedi adeiladu pob cartref gyda gofal a sylw i fanylion, gan gadw preswylwyr y dyfodol mewn cof bob cam o’r ffordd, ac rydym bellach yn hynod falch o fod wedi cwblhau’r cam olaf a darparu 800 o gartrefi o ansawdd uchel.

“Mae’r bartneriaeth lwyddiannus hon rhyngom ni, Tirion, Cadwyn, Cymdeithas Adeiladu Principality a Llywodraeth Cymru wedi trawsnewid hen safle’r felin bapur yn gymuned lewyrchus, gyda chartrefi y gall pobl fod yn falch o fod yn berchen arnynt am genedlaethau i ddod.”